अफगानिस्तानको शानदार जित : युएई ५ विकेटले पराजित

काठमाडौं। आईसीसी पुरुष टी-२० विश्वकप २०२६ अन्तर्गत आज सम्पन्न  खेलमा अफगानिस्तानले संयुक्त अरब इमिरेट्स (युएई)लाई ५ विकेटले पराजित गरेको छ ।

नयाँ दिल्ली अरुण जेट्ली स्टेडियममा सम्पन्न खेलमा टस हारेर पहिले ब्याटिङ गरेको युएईले निर्धारित २० ओभरमा ९ विकेट गुमाउँदै १६० रन बनायो। सोहैब खानले ४८ बलमा ६८ रनको उत्कृष्ट इनिङ खेले भने आलिशान शराफूले ४० रन जोडेकाहुन् ।

बलिङतर्फ अफगानिस्तानका अजमतुल्लाह ओमरजाई प्रभावशाली बने। उनले ४ ओभरमा मात्र १५ रन खर्चेर ४ विकेट लिए। कप्तान राशिद खानले एक विकेट हात पार्दै टी–२० करियरमा ७०० विकेट पूरा गर्ने ऐतिहासिक उपलब्धि हासिल गरे। मुजिब उर रहमानले पनि किफायती बलिङ गरेका छन् ।

१६१ रनको लक्ष्य पछ्याएको अफगानिस्तानले १९.२ ओभरमा ५ विकेट गुमाउँदै लक्ष्य पूरा गर्‍यो। इब्राहिम जाद्रानले ५३ रनको अर्धशतक प्रहार गरे। अन्तिम समयमा अजमतुल्लाह ओमरजाईले २१ बलमा अविजित ४० रन जोड्दै टोलीलाई ४ बल बाँकी छँदै जित दिलाए। दरविश रसुलीले ३३ रन बनाएका हुन् ।

युएईका जुनैद सिद्दीकी र मोहम्मद अर्फानले समान २–२ विकेट लिए पनि टोलीलाई जित दिलाउन सकेनन्। यो अफगानिस्तानको तेस्रो खेलमा पहिलो जित हो। ३ खेलबाट २ अंक जोड्दै उसले सुपर–८ को सम्भावना कायम राखेको छ। युएईको पनि ३ खेलबाट २ अंक रहेको छ।

अब समूह चरणको अन्तिम खेलमा युएईले दक्षिण अफ्रिकासँग प्रतिस्पर्धा गर्नेछ भने अफगानिस्तानले क्यानडासँग भिड्नेछ।महत्त्वपूर्ण जितसँगै अफगानिस्तानले प्रतियोगितामा पुनरागमन गरेको छ। आगामी खेलहरूले दुवै टोलीको यात्रा तय गर्नेछन्।