जनकपुरमा कांग्रेसको महासभा : दुई लाख सहभागीको दाबी

काठमाडौं । मधेस प्रदेशको राजधानी जनकपुरधाममा आज नेपाली कांग्रेसले बृहद् प्रतिज्ञा सभा आयोजना गर्दैछ।

चुनावी माहोल तातेका बेला आयोजना गरिएको यस सभामार्फत पार्टीले आफ्नो आगामी कार्यदिशा र योजनासहितको प्रतिज्ञापत्र सार्वजनिक गर्ने तयारी गरेको हो।

सभामा पार्टीका शीर्ष नेताहरूको उपस्थिति रहने बताइएको छ। विशेषगरी गगन थापा सहित केन्द्रीय नेतृत्व सहभागी हुने कार्यक्रम रहेको कांग्रेस स्रोतले जनाएको छ। कार्यक्रममा देशभरबाट आएका कार्यकर्ता र समर्थकहरूको उल्लेखनीय उपस्थिति रहने दाबी गरिएको छ।

कांग्रेसले सभामा करिब दुई लाख कार्यकर्ता उतार्ने लक्ष्य राखेको जनाएको छ। सभालाई मध्यनजर गर्दै जनकपुरधामका विभिन्न स्थानमा सुरक्षा व्यवस्था कडा पारिएको छ भने ट्राफिक व्यवस्थापनसमेत विशेष रूपमा गरिएको छ।

चुनावी प्रतिस्पर्धा तीव्र बन्दै गइरहेका बेला आयोजित यो सभा कांग्रेसका लागि शक्ति प्रदर्शनको अवसरका रूपमा हेरिएको छ। प्रतिज्ञापत्रमार्फत जनतासामु नयाँ प्रतिबद्धता र विकासका योजनाहरू सार्वजनिक गरिने जानकारी दिएको छ।

जनकपुरको यो सभा आगामी चुनावी समीकरणमा निर्णायक सन्देश दिने अपेक्षा गरिएको छ। कांग्रेसले जनमत आफ्नो पक्षमा तान्ने विश्वास व्यक्त गरेको छ भने अब जनताको प्रतिक्रिया कस्तो आउँछ भन्नेमा सबैको ध्यान केन्द्रित भएको छ।