एमालेको झण्डा जलाएको पुष्टि भए रास्वपाबाटै कारबाही हुन्छ : रवि लामिछाने

काठमाडौं। राष्ट्रिय स्वतन्त्र पार्टी (रास्वपा)का सभापति रवि लामिछानेले एमालेको झण्डा जलाउने घटनामा आफ्नै पार्टीका कार्यकर्ता संलग्न भएको प्रमाणित भए कडा कारबाही गरिने बताएका छन्।

शुक्रबार दाङमा आयोजित चुनावी सभालाई सम्बोधन गर्दै उनले यस्तो घटना रास्वपाको चरित्रसँग मेल नखाने उल्लेख गरे। उनले घुसपैठको सम्भावना पनि औंल्याउँदै कसैले नियोजित रूपमा दोषारोपण गर्न खोजेको भए त्यसप्रति सतर्क रहन चेतावनी समेत दिएका हुन्।

लामिछानेले आफ्ना समर्थकमाथि अनावश्यक आरोप र गालीगलौज भइरहेको दाबी गरे। रास्वपा तीन वर्षअघिमात्र स्थापना भएको स्मरण गराउँदै उनले पार्टीले कसैलाई “जन्माएको” नभई असन्तुष्ट जनताले नयाँ विकल्प रोजेको बताए।

उनले आफूविरुद्ध लागेका विभिन्न आरोपबारे प्रत्यक्ष प्रतिक्रिया नदिने धारणा दोहोर्‍याए। मध्यरातमा प्रहरीले अन्तिम इच्छा सोधेको प्रसंग उल्लेख गर्दै उनले त्यसको जवाफ मतपत्रमार्फत दिन आह्वान गरे।

पुराना दलहरूलाई लक्षित गर्दै उनले संगठनमा गर्व छ भने प्रतिपक्षमा बसेर खबरदारी गर्न आग्रह गरे र एउटै सिट पनि नजित्ने वातावरण बनाउन मतदातासँग अपिल गरे।

घटनाबारे सत्यतथ्य पुष्टि गर्न अनुसन्धान आवश्यक रहेको उनले बताएका छन् भने विवादबारे थप स्पष्टता आउने अपेक्षा गरिएको छ।