मेची भन्सारबाट अलैँची निर्यातमा उछाल, ८ अर्ब ६१ करोड नाघ्यो

काठमाडौं। मेची भन्सार कार्यालयबाट चालु आर्थिक वर्ष २०८२/८३ को माघ मसान्तसम्म अलैँची निर्यातमा उल्लेखनीय वृद्धि देखिएको छ।

कार्यालयका अनुसार १० महिनाको अवधिमा ८ अर्ब ६१ करोड २० लाख ७ हजार रुपैयाँ बराबरको अलैँची विदेश पठाइएको छ, जुन अघिल्लो वर्षको सोही अवधिको तुलनामा ५९.८० प्रतिशतले बढी हो।

सूचना अधिकारी ईश्वरकुमार हुमागाईंका अनुसार चालु आवमा ४ हजार १५३.१५ मेट्रिकटन अलैँची निर्यात भएको छ। गत आर्थिक वर्ष २०८१/८२ को यही अवधिमा भने ५ अर्ब ३८ करोड ८० लाख २० हजार रुपैयाँ बराबरको अलैँची निर्यात भएको हो।अलैँचीको निर्यात बढ्दा चियाको निर्यातमा भने गिरावट आएको छ। चालु आवको १० महिनामा २ अर्ब ३२ करोड १२ लाख ५६ हजार रुपैयाँको चिया निर्यात भएको छ, जुन अघिल्लो वर्षको तुलनामा २६.७० प्रतिशतले कम छ।

गत आवको सोही अवधिमा ३ अर्ब १६ करोड ६२ लाख १३ हजार रुपैयाँको चिया निर्यात भएको हो। अन्य वस्तुमा अवस्था भन्सार कार्यालयको विवरण अनुसार भेनियर सिट (९१.१०%), छुर्पी (६३.३०%), अदुवा/सुठो (१०१.८०%), काउली, ब्रोकाउली र बन्दागोभी (३६.१०%), मुसुरो दाल (३१६.२०%) तथा जडीबुटी (९२.९%) को निर्यातमा वृद्धि देखिएको छ। यता प्लाउड (४०.९०%) र अम्रिसो (२४.९०%) को निर्यातमा भने कमी आएको छ।

मेची भन्सारबाट चालु आर्थिक वर्ष २०८२/८३ को माघ मसान्तसम्म कुल १६ अर्ब ३ करोड १५ लाख ८३ हजार रुपैयाँ बराबरको मालवस्तु निर्यात भएको कार्यालयले जानकारी दिएको छ।

अलैँची निर्यातमा देखिएको तीव्र वृद्धिले समग्र निर्यात व्यापारलाई सकारात्मक संकेत दिएको छ, यद्यपि चियाजस्ता केही वस्तुमा गिरावटले चुनौती कायम रहेको देखिन्छ।