कालिकोटमा ३७ जना नेता नेकपा (माओवादी) प्रवेश,समपूर्ण जनतालाई एकताबद्ध हुन प्रकाण्डको अपिल

काठमाडौं । कालिकोटमा आज ३७ जना नेता तथा कार्यकर्ताहरू नेपाली कम्युनिष्ट पार्टी र कांग्रेस छोडेर नेकपा (माओवादी)मा प्रवेश गरेका छन्।

उनीहरुलाई नेपाल कम्युनिस्ट पार्टी (माओवादी ) का प्रवक्ता खड्क बहादुर बिश्वकर्मा प्रकाण्डने स्वागत गरेका छन्। साथै, कमरेड प्रकाण्डले आगामी निर्वाचनलाई लक्षित गर्दै कालिकोटका जनतालाई एकताबद्ध हुन अपिल गरेका हुन्।

घरदैलो अभियानको क्रममा सम्बोधन गर्दै उनले कालिकोटका इमानदार र सचेत नागरिकहरूले राष्ट्रको पक्षमा उभिने विश्वास व्यक्त गरेका हुन् । उनले जनताको एकताले सही निर्णय गर्दै देशलाई विजयको दिशामा अघि बढाउने बताए।

प्रकाण्डले निर्वाचन केवल प्रतिनिधि सभा सदस्य छान्ने प्रक्रिया मात्र नभई राष्ट्रको भविष्य निर्धारण गर्ने अवसर भएको उल्लेख गर्दै सबैलाई सक्रिय सहभागिताका लागि आग्रह गरेका छन्।

उक्त प्रवेश र प्रकाण्डको अपिलसँगै कालिकोटको चुनावी माहोल थप सक्रिय बनेको छ। आगामी निर्वाचनमा जनताको निर्णयले स्थानीय तथा राष्ट्रिय राजनीतिमा महत्वपूर्ण प्रभाव पार्ने अपेक्षा गरिएको छ।