इरानको कडा चेतावनी  ‘सबैभन्दा विनाशकारी’ जवाफी कारबाहीको घोषणा

काठमाडौं । इरानका सर्वोच्च नेता आयतोल्लाह अली खामेनीईको अमेरिका र इजरायलको संयुक्त हवाई आक्रमणमा मृत्यु भएको दाबी सार्वजनिक भएपछि इरानले कडा प्रतिक्रिया दिएको छ।

इरानी सरकारी सञ्चारमाध्यमका अनुसार आफ्नै कार्यकक्षमा भएको आक्रमणमा उनको निधन भएको हो।
करिब ३७ वर्षदेखि देशको नेतृत्व सम्हालिरहेका खामेनीईको निधनपछि इरान सरकारले ४० दिन राष्ट्रिय शोक घोषणा गरेको छ।

इस्लामिक रिभोलुसनरी गार्ड कोर्प्स (आईआरजीसी) ले अमेरिकाका सैन्य अड्डा तथा इजरायल विरुद्ध ‘इतिहासकै सबैभन्दा विनाशकारी’ जवाफी कारबाही गर्ने चेतावनी दिएको छ।

घटनापछि इरानभित्र फरक फरक प्रतिक्रिया देखिएको छ। केही नागरिकले शोक मनाएका छन् भने केही समूहले खुसीयाली मनाएको अन्तर्राष्ट्रिय सञ्चारमाध्यमहरूले जनाएका छन्।

अमेरिकी राष्ट्रपति डोनाल्ड ट्रम्पले खामेनीईलाई इतिहासकै ‘दुष्ट व्यक्ति’मध्ये एक भन्दै उनको मृत्युले इरानी जनतालाई आफ्नो भविष्य तय गर्ने अवसर दिएको बताएका छन्।

इस्लामिक रिभोलुसनरी गार्ड कोर्प्स (आईआरजीसी) इरान का अनुसार आक्रमणमा २०० भन्दा बढी व्यक्तिको मृत्यु भएको छ। अमेरिकी समाचार संस्था सीबीएस न्युज ले करिब ४० जना इरानी अधिकारी मारिएको जनाएको छ।

संयुक्त अरब इमिरेट्स कतार, कुवेत,ओमान, जोर्डन र इराक मा रहेका अमेरिकी सैन्य संरचनालाई लक्षित गर्दै कारबाही सुरु गरेको जानकारी दिएको छ।

यसैबीच, विश्वकै व्यस्त विमानस्थलमध्ये एक दुबई अन्तर्राष्ट्रिय विमानस्थलमा आसपास भएको घटनामा चार जना घाइते भएको त्यहाँको प्रशासनले पुष्टि गरेको हो।

मध्यपूर्व क्षेत्रको अवस्था थप तनावपूर्ण बन्दै गएको छ। अन्तर्राष्ट्रिय समुदायले संयमता अपनाउन आग्रह गरिरहेको छ भने कूटनीतिक पहल तीव्र बनेको छ।