प्रतिनिधिसभा निर्वाचन ऐतिहासिक अवसर : राष्ट्रपति पौडेल

काठमाडौं । प्रतिनिधिसभा सदस्य निर्वाचनको पूर्वसन्ध्यामा राष्ट्रपति रामचन्द्र पौडेलले निर्वाचनलाई केवल सांसद चयन गर्ने संवैधानिक प्रक्रिया मात्र नभई सङ्घीय लोकतान्त्रिक गणतन्त्रलाई थप मजबुत बनाउने महत्वपूर्ण मोडका रूपमा व्याख्या गरेका छन् ।

राष्ट्रका नाममा सोमबार सम्बोधन गर्दै  पौडेलले लोकतन्त्रको रक्षा, सामाजिक न्यायको प्रवर्द्धन र दिगो विकासलाई संस्थागत गर्ने दिशामा नागरिकको सक्रिय सहभागिता अपरिहार्य रहेको बताएका हुन् । उनले विगतका उपलब्धिहरूलाई जोगाउँदै सुशासन, पारदर्शिता र जवाफदेहितालाई अझ सुदृढ बनाउने अवसरका रूपमा निर्वाचनलाई लिन आग्रह समेत गरेका छन् ।

विगतका आन्दोलन र बलिदानबाट स्थापित वर्तमान व्यवस्थालाई थप विश्वसनीय र परिपक्व बनाउने जिम्मेवारी अब नागरिकको मतमार्फत पूरा हुने उल्लेख गर्दै संघीय संरचना कार्यान्वयन, सामाजिक सुरक्षाको विस्तार तथा पूर्वाधार विकासमा हासिल उपलब्धिहरूलाई निरन्तरता दिन स्थिर र उत्तरदायी नेतृत्व आवश्यक रहेको रास्ट्रपतिको धारणा छ।

सबै राजनीतिक दल, उम्मेदवार, सञ्चारमाध्यम तथा सरोकारवाला निकायलाई शान्तिपूर्ण, स्वतन्त्र र निष्पक्ष वातावरणमा निर्वाचन सम्पन्न गराउन आ–आफ्नो भूमिका जिम्मेवार ढङ्गले निर्वाह गर्न अपिल गरे । राष्ट्रपति पौडेलको सम्बोधनले आगामी निर्वाचनलाई लोकतान्त्रिक अभ्यासको परिक्षाका रूपमा चित्रित गरेको छ।

लोकतन्त्र सुदृढीकरण, सामाजिक न्याय र समृद्धिको साझा लक्ष्यसहित मतदातालाई सक्रिय सहभागिताका लागि आह्वान गर्दै पौडेलले निर्वाचनलाई राष्ट्रको भविष्य निर्माण गर्ने महत्वपूर्ण अवसरको रूपमा प्रस्तुत गरेका छन् ।