प्रतिनिधिसभा निर्वाचनको मतदान सुरु, थुनिकोटमा विप्लवद्वारा पहिलो मतदान

काठमाडौं । रोल्पाको परिवर्तन गाउँपालिका–३ थुनिकोटस्थित श्री बाल शिक्षा माध्यमिक विद्यालय मतदान केन्द्रमा नेपाल कम्युनिष्ट पार्टी (माओवादी)का महासचिव नेत्रविक्रम चन्द ‘विप्लव’ले पहिलो मतदान खसाल्दै मतदान प्रक्रिया सुरु गरेका छन् ।

बिहीबार बिहान निर्धारित समयमै मतदान केन्द्र खुलेपछि महासचिव विप्लवले आफ्नो मत खसाल्दै मतदानको औपचारिक सुरुवात गरेका हुन्। मतदान केन्द्रमा बिहानैदेखि मतदाताको उपस्थिति देखिएको छ भने शान्तिपूर्ण वातावरणमा मतदान भइरहेको स्थानीय प्रशासनले जनाएको छ।

प्रतिनिधिसभा निर्वाचनलाई सुरक्षित, निष्पक्ष र व्यवस्थित रूपमा सम्पन्न गराउन सुरक्षा निकायसमेत परिचालन गरिएको छ।मतदान केन्द्रमा नेपाल प्रहरी, सशस्त्र प्रहरी र आवश्यक सुरक्षाकर्मीको उपस्थिति रहेको छ।

देशभरका विभिन्न मतदान केन्द्रहरूमा पनि मतदाताहरू बिहानैदेखि लाइनमा बसेर आफ्नो मताधिकार प्रयोग गरिरहेका छन्। निर्वाचन शान्तिपूर्ण रूपमा सम्पन्न हुने अपेक्षा गरिएको छ।