प्रतिनिधिसभा निर्वाचन : अधिकांश स्थानमा शान्तिपूर्ण मतदान,६ हजारभन्दा बढी उम्मेदवारको भविष्य मतपेटिकामा

काठमाडौं । प्रतिनिधिसभा सदस्य निर्वाचन बिहीबार बिहान ७ बजेदेखि सुरु भएको मतदान साँझ ५ बजे सम्पन्न भएको छ।

तोकिएको समयभित्र मतदान केन्द्र पुगेका मतदाताले भने लाइनमा बसेर मतदान गर्ने अवसर पाउने छन् ।

निर्वाचन आयोगका अनुसार देशभर छिटपुट घटनाबाहेक मतदान प्रक्रिया समग्रमा शान्तिपूर्ण रूपमा सम्पन्न भएको छ। सुरक्षा व्यवस्थासहित अधिकांश मतदान केन्द्रमा मतदाताको उल्लेखनीय सहभागिता देखिएको बताइएको छ।

यस निर्वाचनमा प्रत्यक्षतर्फ १६५ र समानुपातिकतर्फ ११० गरी कुल २७५ सिटका लागि ६ हजार ५४१ उम्मेदवार प्रतिस्पर्धामा रहेका हुन् । प्रारम्भिक विवरणअनुसार ५० प्रतिशतभन्दा बढी मत खसेको अनुमान गरिएको छ।

देशभर करिब १ करोड ८९ लाख मतदाता रहेको निर्वाचनमा हजारौँ मतदान केन्द्रमार्फत मत खसाल्ने व्यवस्था मिलाइएको हो। मतदान केन्द्रमा ज्येष्ठ नागरिक, अपाङ्गता भएका व्यक्ति, अशक्त तथा गर्भवती महिलालाई प्राथमिकतासमेत दिइएको छ ।

मतदानलाई सुरक्षित र व्यवस्थित बनाउन नेपाली सेना, नेपाल प्रहरी, सशस्त्र प्रहरी तथा अन्य सुरक्षा निकायका ठूलो संख्यामा सुरक्षाकर्मी परिचालन गरिएको छ ।

अब मतगणनाको तयारी सुरु हुँदैछ भने, अन्तिम परिणामसँगै नयाँ संसद्को तस्वीर स्पष्ट हुने अपेक्षा गरिएको छ।