उदयपुरमा ७५० किलो गाँजा बरामद, दुई जना पक्राउ

काठमाडौं। उदयपुरको चौदण्डीगढी नगरपालिकास्थित मदन भण्डारी सडकबाट प्रहरीले ७५० किलो गाँजासहित दुई जनालाई पक्राउ गरेको छ ।

को १ ज ३४५६ नम्बरको जिपबाट उक्त परिमाणको गाँजा बरामद गरिएको जिल्ला प्रहरी कार्यालय उदयपुरका प्रवक्ता केदारमान दोङले जानकारी दिए ।

बरामद गाँजासहित जिप चालक बेलटार नगरपालिका–६ निवासी रवीन राई र रामबहादुर राईलाई नियन्त्रणमा लिइएको प्रहरीले जनाएको छ ।

गाडीभरी गाँजा लोड गरी डेलिभरीका लागि लैजाँदै गरेको अवस्थामा उनीहरू पक्राउ परेका हुन् ।

प्रहरीले घटनाबारे थप अनुसन्धान गरिरहेको जनाएको छ ।