प्रधानमन्त्री कार्कीले तीन दलका शीर्ष नेतालाई चुनावमा सहभागी हुन निम्ताे दिइन्

काठमाडौं । प्रधानमन्त्री सुशीला कार्कीले नेपाली कांग्रेसका सभापति शेरबहादुर देउवा, नेकपा एमालेका अध्यक्ष केपी शर्मा ओली र नेपाली कम्युनिस्ट पार्टीका संयोजक पुष्पकमल दाहाल प्रचण्डलाई आगामी निर्वाचनमा सहभागी हुन निम्ताे दिएकी  छिन् ।

शनिबार बालुवाटारमा भएको छलफलमा प्रधानमन्त्री कार्कीले नेताहरूलाई आफ्नो निमन्त्रणा स्वीकार गरी बालुवाटारमा उपस्थित हुन लाग्नुभएकोमा धन्यवाद दिइन्। उनले राष्ट्रपतिबाट चुनाव गराउने कार्यादेश पाएअनुसार प्रशासनिक तयारी भइरहेको जानकारी गराउँदै सबै आवश्यक मन्त्रालयहरू अन्य मन्त्रीहरूलाई जिम्मा लगाएको बताइन्।

प्रधानमन्त्री कार्कीले भनेकी छन्, “मैले यहाँहरूलाई बोलाएर बिन्ती गर्न खोजेको के भने यो निर्वाचन जसरी पनि सफल पारौं। सबै यसमा सहभागी हुनुपर्छ।” उनले निर्वाचन आयोग र प्रहरी प्रशासनलाई आवश्यक स्रोतसाधन उपलब्ध गराएको र सुरक्षाकर्मीको मनोबल बढाएको समेत जानकारी दिइन् ।

“अब कुनै अलमल नगरी यो राष्ट्रको भविष्य सम्झेर, स्थिर र दिगो लोकतन्त्र सुनिश्चितताका लागि चुनाव सफल पारौं। यो हामी सबैको जिम्मेवारी हो। यत्ति अनुरोध गर्न मैले यहाँहरूलाई आज निम्ताे गरेकी हुँ।”