आजदेखि म्यादी (निर्वाचन) प्रहरी भर्ना, १ लाख ३३ हजारभन्दा बढी माग

काठमाडौं । सरकारले प्रतिनिधि सभा निर्वाचनलाई लक्षित गर्दै आजदेखि म्यादी (निर्वाचन) प्रहरी भर्नाका लागि आवेदन खुला गरेको छ।

आगामी २१ फागुनमा हुने निर्वाचनका लागि प्रहरी प्रधान कार्यालय अन्तर्गत मानवस्रोत विकास विभाग, भर्ना छनोट शाखाले एक लाख ३३ हजार ९८० जनाको माग सार्वजनिक गरेको हो।

सूचनाअनुसार जिल्ला प्रहरी परिसर काठमाडौंबाट आजैदेखि दरखास्त संकलन सुरु भएको छ, जुन माघ १ गतेसम्म चल्नेछ। बिदाका दिनसमेत आवेदन लिन व्यवस्था गरिएको छ।

उम्मेदवारहरूले काठमाडौं, भक्तपुर र ललितपुरका जिल्ला प्रहरी परिसर तथा देशभरका सबै जिल्ला प्रहरी कार्यालयबाट आवेदन दिन सक्नेछन्। छनोट प्रक्रियामा पूर्वसुरक्षाकर्मी, पूर्ववन रक्षक, साथै पछिल्लो समय विभिन्न सुरक्षा निकायको भर्नामा शारीरिक तन्दुरुस्ती र स्वास्थ्य परीक्षणमा उत्तीर्ण भएकाहरूलाई प्राथमिकता दिइने जनाइएको छ।

यसअघि भएका निर्वाचनमा म्यादी प्रहरीका रूपमा सन्तोषजनक सेवा दिएका व्यक्ति तथा विदेशी सुरक्षा निकायमा काम गरी सेवा निवृत्त भएका नेपाली नागरिकले पनि प्राथमिकता पाउने सूचनामा उल्लेख छ।

निर्वाचनको सुरक्षा व्यवस्थापनलाई प्रभावकारी बनाउन म्यादी प्रहरी भर्ना प्रक्रिया अघि बढाइएको सरकारले जनाएको छ। आवश्यक प्रक्रिया पूरा गरी योग्यता पुगेका इच्छुक नेपाली नागरिकलाई तोकिएको समयसीमाभित्र नजिकको जिल्ला प्रहरी कार्यालयमा आवेदन दिन आग्रह गरिएको छ।