जसपा–लोसपा एकताको औपचारिक थालनी, १२ बुँदे सहमति

काठमाडौँ । जनता समाजवादी पार्टी (जसपा) नेपाल र लोकतान्त्रिक समाजवादी पार्टी (लोसपा) नेपालले पार्टी एकताका लागि १२ बुँदे समझदारी गरेका छन् ।

आइतबार सम्पन्न सहमतिसँगै दुवै दलले संयुक्त रूपमा ४३ सदस्यीय केन्द्रीय समन्वय समिति बनाउने निर्णय गरेका हुन् ।

समन्वय समितिको संरक्षकको जिम्मेवारी महन्थ ठाकुरलाई दिइएको छ भने उपेन्द्र यादव अध्यक्ष चयन भएका छन् । समितिले आगामी दिनमा ११ सदस्यीय सचिवालय गठन गर्ने सहमति पनि भएको छ ।

सम्झौताअनुसार एकीकृत दलको नाम ‘जनता समाजवादी पार्टी (जसपा) नेपाल’ रहनेछ । पार्टी एकीकरणको बाँकी प्रक्रिया प्रचलित कानुनअनुसार अघि बढाइने उल्लेख गरिएको छ । पूर्ण एकता सम्पन्न नहुँदासम्म पार्टी सञ्चालनको जिम्मा केन्द्रीय समन्वय समितिले सम्हाल्नेछ ।

दुवै दलका भातृ, शुभेच्छुक संगठन तथा विभागहरू समन्वय समितिको मातहतमा रही कार्य गर्ने सहमति भएको हो।

एकीकरण र समायोजन प्रक्रिया पूरा नहुन्जेलसम्म हाल कायम संगठन संरचनाले समन्वय समितिकै निर्देशनमा काम गर्नेछन् ।
आगामी फागुन २१ गते हुने चुनावका उम्मेदवार छनोटमा संरक्षक महन्थ ठाकुर र अध्यक्ष उपेन्द्र यादवको संयुक्त हस्ताक्षर रहने व्यवस्था गरिएको छ ।

साथै, राष्ट्रिय सभा सदस्यका लागि जसपा नेपालबाट दिइएको उम्मेदवारी फिर्ता लिने विषयमा पनि सहमति जुटेको छ । एकीकृत पार्टीको झण्डा लोसपा नेपालको रहने निर्णय गरिएयो छ।

जसपा र लोसपाबीचको यो सहमतिले मधेस केन्द्रित राजनीतिमा नयाँ समीकरणको संकेत दिएको छ ।अब औपचारिक एकतासम्मको यात्रा कसरी अघि बढ्छ भन्नेमा राजनीतिक वृत्तको ध्यान केन्द्रित भएको छ ।

जसपा र लोसपाबीच भएको यो सहमतिलाई पार्टी एकताको निर्णायक सुरुवातका रूपमा हेरिएको छ ।बाँकी प्रक्रिया समयमै पूरा भएमा मधेस राजनीतिमा नयाँ शक्ति सन्तुलन बन्ने अपेक्षा गरिएको छ ।