रोल्पाबाट चुनाव लड्ने पक्का भएपछि महासचिव विप्लवको तयारी तीव्र

काठमाडौँ । रोल्पाबाट प्रतिनिधि सभा निर्वाचनमा उम्मेदवारी दिने निश्चित भएपछि नेकपा (माओवादी) का महासचिव नेत्रविक्रम चन्द ‘विप्लव’ले चुनावी तयारीलाई तीव्र बनाएका छन्। उनले आन्तरिक छलफलसँगै विभिन्न भेला–बैठकहरू सुरु गरेका हुन्।

महासचिव विप्लव आज रोल्पाबाट काठमाडौँ आएर ललितपुरमा विभिन्न क्षेत्रका क्रियाशील व्यक्तिहरूसँग छलफलमा सहभागी भएका छन्। छलफलका क्रममा उनले एकपटक रोल्पाली जनताको बीचमा पुगेर प्रत्यक्ष संवाद गर्न चाहेको बताउँदै आवश्यक सहयोगको आग्रह गरेका छन्।

उनले भने, “पार्टी र रोल्पाली जनताको आकाङ्क्षा एकपटक रोल्पाबाटै अघि बढ्नुपर्छ भन्ने छ। पार्टीले पनि जिल्लाबाट मलाई सिफारिस गरेको छ। अब एकपटक रोल्पाली जनताको बीचमा गएर आव्हान गर्छौँ।

नेकपा (माओवादी) रोल्पा जिल्ला सङ्गठनले महासचिव विप्लवलाई प्रतिनिधि सभा निर्वाचनका लागि एकल उम्मेदवारका रूपमा सिफारिस गरेको छ। सिफारिससँगै उनले चुनावी तयारीलाई थप सक्रिय बनाएका हुन्।

कार्यक्रममा पार्टीका स्थायी कमिटी सदस्य तथा लुम्बिनी प्रदेश इन्चार्ज सन्तोष बुढामगरले महासचिव विप्लव रोल्पाबाटै चुनाव लड्ने कुरा पक्का भइसकेको स्पष्ट पारे। उनले भने, “यो पक्का हो कि महासचिव कमरेड विप्लव रोल्पाबाटै चुनाव लड्नुहुन्छ। लुम्बिनी प्रदेश इन्चार्जको हैसियतले पनि म यो कुरा स्पष्ट रूपमा भन्न चाहन्छु।”

महासचिव विप्लवले आगामी निर्वाचनमा देशभर आफ्ना उम्मेदवार खडा गरिने जानकारी दिँदै सबै उम्मेदवारलाई जिताउन पार्टीले अधिकतम शक्ति परिचालन गर्ने बताए।

उनले भने, “देशैभर हामी उम्मेदवारी दिन्छौँ र हाम्रा सबै उम्मेदवारलाई जिताउन सम्पूर्ण शक्ति लगाउँछौँ।”
महासचिव विप्लव पहिलो पटक प्रतिनिधि सभा निर्वाचनमा उम्मेदवारी दिन लागेका हुन्। सरकारले आगामी फागुन २१ गते प्रतिनिधि सभा निर्वाचनको मिति घोषणा गरिसकेको छ।

राजनीतिक रूपमा अर्थपूर्ण मानिने रोल्पा निर्वाचन क्षेत्रबाट महासचिव विप्लवको उम्मेदवारीले आगामी प्रतिनिधि सभा निर्वाचनलाई थप चासो र प्रतिस्पर्धात्मक बनाउने अपेक्षा गरिएको छ।