कांग्रेस केन्द्रीय कार्यसमितिमा जेन–जी सहभागिता अनिवार्य गर्ने प्रस्ताव

काठमाडौं । नेपाली कांग्रेसको केन्द्रीय कार्यसमितिमा जेनजी उमेर समूहको उल्लेखनीय सहभागिता सुनिश्चित गर्ने प्रस्ताव अगाडि सारिएको छ ।

विशेष महाधिवेशनमा सांगठनिक प्रतिवेदन पेस गर्दै महामन्त्री विश्वप्रकाश शर्माले केन्द्रीय कार्यसमितिमा ३० वर्षमुनिका २० जना र ३० वर्ष पूरा भई ४० वर्ष ननाघेका २० जना गरी कुल ४० जनालाई समेट्ने व्यवस्था प्रस्ताव गरेका हुन् ।

प्रस्तावअनुसार प्रदेश कार्यसमितिमा पनि दुवै उमेर समूहबाट १०–१०जनाको प्रतिनिधित्व रहने व्यवस्था गरिएको छ ।
त्यस्तै भ्रातृ तथा शुभेच्छुक संस्थाबाट पार्टी महाधिवेशनमा सहभागी प्रतिनिधिमध्येबाट न्यूनतम एक महिलासहित तीन जना केन्द्रीय सदस्य रहने प्रावधान अघि सारिएको छ ।

उक्त प्रस्तावले पार्टीभित्र जेन–जी पुस्ताको भूमिका सुदृढ गर्दै संगठनलाई थप समावेशी र गतिशील बनाउने अपेक्षा गरिएको छ । प्रस्तावमाथि विशेष महाधिवेशनमा छलफल भइरहेकाले यससम्बन्धी अन्तिम निर्णय महाधिवेशनबाटै हुने जानकारी गराएको छ ।