गण्डकीका सांसदसँग प्रधानमन्त्रीको छलफल, विकास र समन्वयमा जोड

काठमाडौं । प्रधानमन्त्री बालेन्द्र (बालेन) शाहले गण्डकी प्रदेशका सांसदहरूसँग महत्वपूर्ण छलफल गरेका छन्।

शुक्रबार प्रधानमन्त्री तथा मन्त्रिपरिषद्को कार्यालयमा आयोजित उक्त भेटमा प्रदेश–संघ समन्वय, विकास योजना र जनताका समस्या समाधानका विषयमा गहन कुराकानी भएको जनाइएको छ।

छलफलका क्रममा प्रधानमन्त्री शाहले प्रदेशस्तरका प्राथमिकता योजनालाई संघीय सरकारले आवश्यक सहयोग गर्ने प्रतिबद्धता व्यक्त गरेका छन्। सांसदहरूले भने, आफ्नो क्षेत्रका पूर्वाधार, स्वास्थ्य, शिक्षा र रोजगारीसँग सम्बन्धित समस्याहरू उठाएका हुन् ।

यसअघि प्रधानमन्त्री शाहले कोशी, कर्णाली, सुदूरपश्चिम र मधेस प्रदेशका सांसदहरूसँग समेत यस्तै छलफल गरिसकेका छन्।सरकार सबै प्रदेशसँग समन्वय गर्दै सन्तुलित विकासमा अघि बढ्ने रणनीतिमा रहेको बताइएको छ।

बैठकमा सहभागीहरूले यस्ता छलफललाई नियमित बनाउँदै नीतिगत सुधार र कार्यान्वयनलाई तीव्रता दिनुपर्नेमा जोड दिएका छन्।

प्रधानमन्त्री शाहले देशभरका जनताको अपेक्षा सम्बोधन गर्ने गरी सरकार अघि बढ्ने स्पष्ट पार्दै प्रदेश–संघ सहकार्यलाई अझ सुदृढ बनाउने बताएका छन्।