संसदमा चर्कियो विवाद: ओलीबारे अभिव्यक्ति हटाउन एमाले सांसदको माग

काठमाडौं। प्रतिनिधिसभा बैठकमा आज राजनीतिक तनाव देखिएको छ।

नेकपा (एमाले) का सांसद गुरु बरालले रास्वपाका सांसद पुरुषोत्तम यादवले दिएको अभिव्यक्तिप्रति कडा आपत्ति जनाएका छन्।

यादवले एमाले अध्यक्ष तथा पूर्वप्रधानमन्त्री केपी शर्मा ओलीलाई ‘अपराधी’ भनेर टिप्पणी गरेपछि बरालले उक्त शब्द संसदको रेकर्डबाट तुरुन्त हटाउन माग गरेका हुन्।

बरालले संसदले कसैलाई अपराधी घोषणा गर्न नमिल्ने भन्दै यस्तो निर्णय अदालतबाट मात्र हुने बताए। साथै, उनले उक्त अभिव्यक्ति अपमानजनक र असंसदीय भएको दाबी गरे।

सभामुख डीपी अर्यालले यस विषयप्रति ध्यानाकर्षण भएको जनाउँदै कार्यसूची अगाडि बढाएका छन्।