बैतडीमा दुई मोटरसाइकल ठोक्किँदा एक जनाको मृत्यु, चार घाइते

काठमाडौं। बैतडीमा दुईवटा मोटरसाइकल आपसमा ठोक्किँदा एकजनाको मृत्यु भएको छ भने, चारजना घाइते भएका छन्।

शुक्रबार दिउँसो साढे १ बजे सुर्नया गाउँपालिका–८ स्थित ढोल्यामोड–पुर्चौडी सडकखण्डमा भएको दुर्घटनामा ३४ वर्षीय जनक लुहारको मृत्यु भएको जिल्ला प्रहरी कार्यालय बैतडीले जनाएको छ।

प्रहरीका अनुसार श्रीभावरबाट पुर्चौडीतर्फ जाँदै गरेको मोटरसाइकल र विपरीत दिशाबाट आइरहेको अर्को मोटरसाइकल आपसमा ठोक्किँदा दुर्घटना भएको हो।

दुर्घटनामा पुर्चौडी–५ का २४ वर्षीय अमिर कडायत, सोही वडाका ३९ वर्षीय हिक्मत कुँवर, सिगास गाउँपालिका–९ का ३५ वर्षीय जयबहादुर चन्द र ३६ वर्षीय केशवबहादुर चन्द घाइते भएका हुन्।

घाइतेमध्ये अमिर र हिक्मतलाई थप उपचारका लागि डडेल्धुरा अस्पताल आजै पठाइयो भने, अन्य घाइतेको अवस्था सामान्य रहेको प्रहरीले जानकारी दिएको छ। उक्त घटनाबारे थप अनुसन्धान भइरहेको छ।