हेटौँडामा ट्रकको ठक्करबाट दुई युवकको ज्यान गयो

काठमाडौं । पूर्व–पश्चिम राजमार्गअन्तर्गत हेटौँडा उपमहानगरपालिका–१९ बस्तीपुरमा ट्रकले मोटरसाइकललाई ठक्कर दिँदा दुई युवकको ज्यान गएको छ।

बुधबार जिल्ला प्रहरी कार्यालय मकवानपुरका अनुसार हेटौँडा बजारबाट मनहरीतर्फ जाँदै गरेको ना४३प २२१ नम्बरको मोटरसाइकललाई विपरीत दिशाबाट आइरहेको ट्रकले ठक्कर दिएको हो।

उक्त दुर्घटनामा मोटरसाइकल चालक राक्सिराङ गाउँपालिका–१ निवासी २२ वर्षीय सन्जित स्याङतान र पछाडि सवार १८ वर्षीय अमोश थिङ गम्भीर घाइते भएका हुन् । उपचारका क्रममा उनीहरूको मृत्यु भएको प्रहरीले जानकारी दिएको छ।

प्रहरीका अनुसार ठक्कर दिने ट्रक र चालक फरार रहेका छन्। घटनाबारे थप अनुसन्धान भइरहेको र ट्रक तथा चालकको खोजी कार्य तीव्र पारिएको बताइएको छ।

राजमार्गमा बढ्दो सवारी दुर्घटनाले सर्वसाधारणको सुरक्षाप्रति चिन्ता थपिएको छ। दुर्घटनामा संलग्न ट्रक र चालक पक्राउ परेपछि घटनाको विस्तृत विवरण सार्वजनिक हुने प्रहरीले जानकारी समेत गराएको छ।