कम्युनमा नेकपा (माओवादी) सचिवालयको विस्तारित बैठक जारी (फोटो फिचरसहित)

अर्घाखाँची । नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टी (माओवादी)को सचिवालयको विस्तारित बैठक अर्घाखाँचीको शितगंगास्थित कम्युनमा जारी छ।

पार्टी केन्द्रीय कार्यालय स्रोतका अनुसार बैठकमा सचिवालय सदस्यसँगै विभिन्न प्रदेशका इन्चार्जहरूको समेत सहभागिता रहेको छ।

बैठकमा देशको राजनीतिक अस्थिरता, वर्तमान संकट र त्यसको निकासका विषयमा छलफल भइरहेको छ। साथै अग्रगामी तथा परिवर्तनकारी राजनीतिक धारलाई सशक्त बनाउने विषयमा पनि छलफल भइरहेको स्रोतले जनाएको छ।

त्यसैगरी उत्पादन अभियानलाई व्यवस्थित गर्ने, राज्यका पछिल्ला नीतिविरुद्ध जनजागरण अभियान तथा जनसंघर्ष सञ्चालन गर्ने, वामपन्थी तथा देशभक्त शक्तिसँग मोर्चा निर्माण गर्ने र संगठनको अधिवेशनका विषयमा पनि बैठकमा छलफल भइरहेको छ।

बैठकमा बाढी–पहिरोबाट प्रभावित क्षेत्रमा जारी उद्धार कार्यलाई थप प्रभावकारी बनाउने विषयलाई समेत प्राथमिकताका साथ उठाइएको पार्टी स्रोतले जनाएको छ।