धनुषा घटनाको विरोधमा वीरगञ्ज तनावग्रस्त, प्रहरीद्वारा अश्रुग्यास प्रहार

काठमाडौं । धनुषामा मस्जिदमा भएको तोडफोडको घटनाविरुद्ध आइतबार वीरगञ्जमा भएको विरोध प्रदर्शन उग्र बनेपछि प्रहरीले स्थिति नियन्त्रणमा लिन अश्रुग्यास प्रहार गरेको छ।
प्रदर्शनका क्रममा प्रहरी र प्रदर्शनकारीबीच सामान्य झडप भएको हो।

मुस्लिम समुदायका अगुवाहरूको नेतृत्वमा बिहानैदेखि वीरगञ्जका घण्टाघर, मुर्ली, मालपोत चोक र छपकैया इदगाह चोक लगायतका स्थानमा टायर बालेर नाराबाजी गरिएयो।

छपकैया इदगाह चोकमा स्थिति तनावग्रस्त बनेपछि प्रहरीले पाँच राउण्ड अश्रुग्यास प्रहार गरेको जिल्ला प्रहरी कार्यालय पर्साका प्रमुख प्रहरी उपरीक्षक सुदीपराज पाठकले जानकारी दिए।

प्रदर्शनकारीले त्रिभुवन राजपथ अवरुद्ध गरेपछि वीरगञ्ज महानगरपालिकाको दमकल प्रयोग गरी आगो निभाइएको र सवारी आवागमन पुनः सञ्चालन गरिएको प्रहरीले जनाएको छ। हाल अवस्था नियन्त्रणमा रहेको बताइएको छ।

शनिबार धनुषाको धनुकमला नगरपालिका–६ सखुवा मरानस्थित मस्जिदमा अज्ञात समूहले तोडफोड गरेको घटना सामाजिक सञ्जालमार्फत सार्वजनिक भएपछि वीरगञ्जमा समेत विरोध चर्किएको हो।
प्रदर्शनमा सहभागीहरूले घटनामा संलग्नलाई तत्काल पक्राउ गरी कडा कारबाही गर्न माग गरेका छन्।

जमियतुल उलमा नेपालको केन्द्रीय सहअध्यक्ष मौलाना अली असगर मदानीले घटनालाई निन्दनीय बताउँदै सबै धर्मबीच आपसी सम्मान आवश्यक रहेकोमा जोड दिएका छन्।

धनुषाको घटनाबारे मुस्लिम समुदायका अगुवाहरूले गृह मन्त्रालयमा पुगेर ध्यानाकर्षण गराइसकेको समेत जनाइएको छ।