रास्वपा परित्याग गरेका हुम्लाका नेता महिन्द्र पाण्डे नेपाल कम्युनिस्ट पार्टी (माओवादी)मा प्रवेश

काठमाडौं । सल्यानको कुमाख गाउँपालिकाका राष्ट्रिय स्वतन्त्र पार्टी(रास्वपा) का सदस्य तथा समर्थक उमेश रानाले रास्वपा परित्याग गर्दै आगामी फागुन २१ गते हुने निर्वाचनमा नेपाली कम्युनिस्ट पार्टीलाई सहयोग गर्ने घोषणा गरेका छन्।

यस निर्णयसँगै उठेका विभिन्न प्रश्न र पार्टी छाड्नु पर्ने कारणबारे उनले विशेष खुलासा कार्यक्रममा आफ्ना धारणा सार्वजनिक गरेका हुन्।

कार्यक्रममा रानाले पार्टीभित्र देखिएको आन्तरिक असमझदारी, नीतिगत अस्पष्टता र स्थानीय तहमा अपेक्षित भूमिका नदेखिएको कारण आफू अलग हुनुपरेको बताए।

उनले आगामी निर्वाचनमा वामपन्थी शक्तिलाई मजबुत बनाउने उद्देश्यले नेपाली कम्युनिस्ट पार्टीलाई सहयोग गर्ने निर्णय गरेको स्पष्ट पारे।

यसैबीच, रास्वपा परित्याग गरेका हुम्लाका नेता महिन्द्र पाण्डे नेपाल कम्युनिस्ट पार्टी (माओवादी केन्द्र) मा प्रवेश गरेका छन्।एक कार्यक्रममा उनलाई पार्टी नेतृत्वले स्वागत गर्दै संगठन सुदृढीकरणमा योगदान गर्ने विश्वास व्यक्त गरेको छ।

दल परिवर्तनका यी घटनाले निर्वाचन नजिकिँदै गर्दा स्थानीय राजनीतिक समीकरण थप चासोपूर्ण बन्दै गएको संकेत गरेको छ।

विभिन्न दलभित्रको आन्तरिक अवस्था र नेतृत्वप्रति असन्तुष्ट नेताहरूको धारणा सार्वजनिक हुन थालेसँगै चुनावी माहोल अझ तातिने देखिएको छ।