भ्रमपुर्ण समाचारको नेकपा (माओवादी) द्वारा खण्डन

काठमाडौं । आशिका तामाङ संग माओवादीले चन्दा मागेको र धम्की दिएको भन्ने झुटो र भ्रमपुर्ण समाचार प्रति नेपाल कम्युनिस्ट पार्टी (माओवादी) ले गम्भीर ध्यानाकर्षण गराएको छ।

नेत्र विक्रम चन्द विप्लवले नेतृत्व गरेको नेकपा(माओवादी) को नाम जोडेर आशिका तामाङ सँग चन्दा मागेको र धम्की दिएको भन्दै केही संचार माध्यमहरूले सत्यतथ्य नबुझी भ्रमपुर्ण समाचार प्रकाशन र प्रसारण गरेको भन्दै उक्त पार्टीले आपत्ति जनाएको हो।

आशिका तामाङ सँग चन्दा माग्ने गौरव भन्ने व्यक्ति महासचिव भएको पार्टी हो। सो पार्टीको आर्थिक विभाग प्रमुख कबिर भन्ने व्यक्तिको नाम बाट आशिका तामाङलाई सम्बोधन गरेर आर्थिक माग गरिएको छ। धम्की पनि त्यही पार्टीबाट गएको छ। त्यो हाम्रो पार्टी होइन,अर्कै पार्टी हो भन्ने जान्दाजान्दै हाम्रो पार्टीको नाम जोडि समाचार प्रकाशन प्रसारण गर्नु गम्भीर प्रकारको त्रुटि हो।

उक्त पार्टीका महासचिव गौरव नाम भएको व्यक्ति भएको प्रमाणित हुँदाहुँदै हाम्रो पार्टीका महासचिव विप्लवको नाम जोडेर समाचार प्रकाशन, प्रशारण गर्नुले ती संचार माध्यमहरूले कस्तो पत्रकारिता गरिरहेला छन गम्भीर आशंका पैदा भएको छ , माओवादीका एक केन्द्रिय सदस्यले बताए। हाम्रो पार्टी नेकपा (माओवादी) चुनावी प्रचारप्रसार गरिरहेको छ, अनावश्यक पार्टीको बदनाम गराउने नियतले हाम्रो पार्टीको जबर्जस्ति केही संचार माध्यमले नाम जोडेको ती केन्द्रिय सदस्यले आरोप लगाए।

राज्यको चौथो अङ्ग भनिने प्रेस जगतले सत्यतथ्य नबुझी यस्तो तथ्यहिन भ्रमपुर्ण समाचार प्रकाशन,प्रसारण गर्नु निकै दु:खद भएको बताउँदै समाचार सच्याएर सम्बन्धित संस्थालाई माफी माग्न माओवादीले आग्रह गरेको छ। अन्यथा तथ्यहिन भ्रामक समाचार र संस्था विरुद्ध कानुनी उपचारमा जाने माओवादीले चेतावनी समेत दिएको छ।