साम्बालाई फेरि एसीएल चोट, कम्तीमा ९ महिना मैदान बाहिर

काठमाडौं । नेपाली राष्ट्रिय महिला फुटबल टोलीकी कप्तान तथा स्टार स्ट्राइकर साबित्रा भण्डारी ‘साम्बा’ फेरि गम्भीर चोटमा परेकी छन्।

अस्ट्रेलियन ए–लिगमा वेलिङ्टन फिनिक्सबाट खेलिरहेकी साम्बाको दायाँ घुँडाको एसीएल (ACL) ग्राफ्ट पुनः च्यातिएको पुष्टि भएको छ।

ब्रिसबेन रोअरविरुद्धको खेलको दोस्रो हाफमा गोलकिपरसँग ठोक्किएपछि उनी घाइते भएकी थिइन्। त्यसपछि गरिएको एमआरआई परीक्षणले पुरानै एसीएल ग्राफ्ट टियर भएको देखाएको क्लबले जनाएको छ। यस चोटका कारण साम्बाले ए–लिगको बाँकी सिजन गुमाउने भएकी छन्।

क्लबका अनुसार उनी अब करिब ९ देखि १२ महिनासम्म मैदान बाहिर रहनेछिन्। यसअघि सन् २०२१ मा पनि साम्बाले सोही घुँडाको शल्यक्रिया गराएकी थिइन्।

वेलिङ्टन फिनिक्सकी प्रशिक्षक बेभ प्रिस्टम्यानले साम्बा उत्कृष्ट खेलाडी मात्र नभई टोलीका लागि प्रेरणाको स्रोत भएको बताउँदै उनको चोटबाट सबै दुःखी भएको प्रतिक्रिया दिएकी छन्। यद्यपि, साम्बाले पुनरागमनका लागि बलियो आत्मविश्वास र दृढ इच्छाशक्ति देखाएको पनि प्रशिक्षकले जनाएकी छन्।

नेपाली महिला फुटबलका लागि यो चोट ठूलो धक्का मानिएको छ। समर्थकहरूले साम्बाको शीघ्र स्वास्थ्यलाभ र मजबुत पुनरागमनको कामना गरिरहेका छन्।